तुला राशिलाई यो वर्ष उत्साहजनक प्रारम्भिक परिवेशबाट बीचमा केही अवरोहण भए पनि उत्तरार्धमा सफलताको उचाइ प्राप्त गर्न सकिनेछ। गृहस्थी भावमा बृहस्पतिको उपस्थितिले वर्षारम्भदेखि नै विभिन्न अवसर प्राप्त हुनेछन्। पढाइलेखाइ सामान्य रहे पनि नतिजाले उत्साह जगाउनेछ। नोकरीमा प्रवेश, पदोन्नति वा अनुकूल स्थानान्तरण हुने बलियो सम्भावना देखिन्छ। प्रयत्न गर्दा देश–विदेशको यात्रा गर्ने साइत जुर्न सक्छ। व्यापार र उद्योगले उचाइमा पुर्याउनेछ। अर्थ उपार्जनका विभिन्न स्रोत जुट्नेछन् भने आवास, भूमि तथा सवारीसुख प्राप्त हुने समय छ। मिहिनेतले प्रतिष्ठित स्थान दिलाउनुका साथै जीवनशैलीमा परिवर्तन आउनेछ। यो वर्ष भाग्यले प्रेमपात्र जुराउनेछ। घर–गृहस्थी र सन्तान सुखको भागीदार भइनेछ। देवगुरुका साथमा राहुको समेत युतिसम्बन्ध रहेकाले जन्मकुण्डलीमा राहु प्रतिकूल हुनेहरूलाई असोजसम्म घर–गृहस्थीमा केही बाधाहरू आउनेछन्। पतिपत्नीमा असमझदारी, जीवनसाथीको स्वास्थ्यमा कमजोरी, काममा ढिलासुस्ती, आर्थिक मन्दी, घरजग्गा बन्धकी जस्ता समस्या आउन सक्छन्। विद्याभावका शनि र शीर्षभावका केतु प्रतिकूल हुनाले आलस्य र उदासीन प्रवृत्ति बढ्ने हुँदा प्रगतिको मार्ग संकुचित बन्ने देखिन्छ। दीर्घकालीन योजना नहु“दा उपलब्धिबिनै समय व्यतीत हुनेछ। प्रतिस्पर्धीहरूले आफ्ना कमजोरीको फाइदा उठाउने चेष्टा गर्नेछन्। अध्ययनमा लक्ष्य प्राप्त गर्न समय लाग्नेछ। पेटको समस्याले स्वास्थ्य कमजोर बन्न सक्छ। विदेश ताक्नेहरूलाई असारदेखि असोजसम्मको समय फलदायी रहनेछ। कार्तिकदेखि शत्रुभावमा जाने राहुको अनुकूल प्रभावले पारिवारिक समस्या समाधान हुनेछन् र अधुरा काम पनि सम्पादन हुनेछन्। केतुको प्रभावले खर्च बढ्ने र वैदेशिक यात्रामा समस्या पर्ने देखिन्छ। प्रतिकूल ग्रहको प्रभाव अनुकूल बनाउन इष्टदेवता र सम्बद्ध ग्रहको पूजा–आराधना गर्नुहोला। महाँकाल, हनुमान र काली भगवतीको पूजा गर्नाले र शनिवार पीपलको पूजा गरी जल चढाउनाले शनिदेवको दुष्प्रभावबाट मुक्त भइनेछ। बटुकभैरव र छिन्नमस्ताको पूजा गर्दा राहु र केतुको दोष शान्त हुनेछ। साउन, भदौ, पुस र चैत महिनामा विशेष सफलता मिल्नेछ।
उपप्रा. लक्ष्मीप्रसाद बराल (फलितज्योतिषाचार्य)
Comments
Post a Comment